En sonnije Heimatspaziergang

Häud morje wôh, wie jede Samsdaach, mäine kleine Lieblingsbroda zom Fröhstöck dôh. Unsere Gang donnôh off de Maat wôh häud morje e besje spät. Ed Walli hatt schunn bahl alles verkaaft, kei Rindersteak mieh dôh, keine Räuscherschinke mieh. Awwer en loftgedrockende Schinke wôh noch dôh on die Salami nôh sardischer Art hatt och lecker ausgesehn. Su säima dann widda heim, jeder hat säin kleine Enkaufsrunde gedrääscht on am Nommendaach hamma uns widda en Kesselemm am Graf von de alte Herrschafte getroff. Wäihnachde wôh dänne jôh emma wischdisch, bie se noch geleeeft hann.

Als ma inne dann Fruhe Wäihnachde gewünscht hadde, semma en kleine Runde ommed Dorf geloff. Dôh komme doch emma Erinnerunge huh.
"Ber haddann dôh gewohnt?"
"Wôh datt häi ned em Schang säi Häusje?"
onn emma suh wäida. Ma hann en der Treppegass geguckt, säin die onnere Kärschstrôß eronner onn am Rhäin hamma dann e Bildsche gemacht.

Wäidasbursch met säiner Kärsch.

Wemma genau hinguckt, seht ma medde em Rhäin en graue Floss rausgucke. Ob jetz en graue Hai onnerwees es? Wäider ging ed die Scheffegass huh, wo ich off de Welt komme bin, on dann Bäckersch Berjelsche widda eronner.
"Dôh hat de Booze Pitter gewohnt!"
"On häi datt wôh Münzels Rud!"
Am Enn vom Dorf säima dat Wejelsche bäim Med schrääsch gäänüwwer renngange on üwwa de Boomer Bach on de Trillweesch widder end Dorf zeröck. Unser Ellerehaus mossde ma ntürlich ôch fotografiere,

Häi säimer gruß gewuhre

Üwwer de Huhgass ging ed dann widda zeröck, an der Schull vorbäi, on paar Meder wäida hamma ed Doris getroff, datt wôred Floss am kehre. Mir moosde all dräimôh hingucke, bis ma ons widdaerkannt hann. Durch ed Näubaugebiet semma dann hinnerem Kerchhoff widda zeröck gange on von dôh geddet noch e Bildsche en Rischdung Basjanes.

Watt en Himmel üwwerem Örtsche!

Datt ma dann offem Parkplatz noch de Mud getroff hann, wôh ôch schön. Alles an allem wôhred en schöne Nommendaachsspaziergang bäi angenehme Temperature on ohne Rään. Die alte Heimat es doch emma wadd besonderes.